HABARI ZA SHINYANGA: Wimbi la Mauaji ya Vikongwe Shinyanga lapungua!

WIMBI la mauaji ya Vikongwe na Watu wasio na hatia uliokuwa unafanyika katika Mkoa wa Shinyanga, ambapo maisha ya watu ya Wananchi wake yalikuwa yanakatishwa na baadhi ya Watu kwa Imani za Kishirikina hali sasa ni shwari.

 

Kamanda wa Polisi Mkoa wa Shinyanga, Evarist Mangala amesema kuhusiana na hali hiyo Jeshi limejitahidi kupambana na wahalifu wanaoshiriki Vitendo hivyo na kuiachia Sheria kupambana nao ili kukomesha tatizo hilo.

Amesema hatua hiyo imefanikiwa kutokana na Elimu ambayo Jeshi hilo limekuwa likiitoa, ili kuondoa dhana iliyokuwa imejengeka miongoni mwa jamii hiyo katika Mkoa wa Shinyanga.

Aidha alisema katika kipindi cha mwezi Februari na Machi hakuna tukio lolote ambalo limetokea likihusishwa na Imani hizo, ambapo ikilinganishwa na kipindi kilichopita ambapo Vikongwe waliuwawa alikuwemo, Lucia Mgonga (55) mkazi wa kijiji cha Mega  Wilayani Kahama, Ng’wana Gimbishi (75) aliyeokotwa katika Soko la Mitumbani (hakujulikana makazi yake), Esha Juma (61) Mkazi wa Ngokolo naHappyness Paulo (48), mkazi wa Majengo, na wengine ambao hakuweza kuwataja majina yao, wakiwa wameuwawa kwa kuhusishwa na Imani za kishirikina.

“Sasa hivi watu wameelimika tuko kwenye karne ya Sayansi na Tekinolojia, mambo ya kuuana Watu wameona ni suala ambalo limepitwa na wakati tofauti na ilivyokuwa hapo awali ambapo kama ilikuwa inapita wiki bila kuripotiwa tukio la mauaji yanayohusishwa na Imani hizo ilikuwa bahati” alisema Mangala

Amesema kutoka na hali hiyo Mahakama ya Wilaya Kahama inaendelea kushughulikia kesi mbalimbali zikiwemo Zinazohusishwa na Imani za Kishirikina na Mahakama ya Mwanzo Mjini Shinyanga.

Mbali na hayo alisema, mauaji ya watu mbalimbali wakiwemo yalikuwa yakifanywa nyakati za usiku na alfajiri ambapo wauaji walikuwa wanavunja Nyumba za watu wanaohisiwa kuhusika na hali hiyo na kubakwa na wengine kuchukuliwa viungo vya miili yao ikiwemo viungo vya sehemu za siri.

“Sasa hivi hakuna matukio ya mauaji yeyote ambayo yanaripotiwa mara kwa mara ni ‘machache’ wameachana na hayo mambo na mwaka huu tangu uanze hali imekuwa shwari kidogo.

Mkoa wa Shinyanga ni miongoni mwa Mikoa ya Kanda ya Ziwa, ambayo inatajwa kuwa Wananchi wake wanaamini suala la ushirikika kama sehemu ya maendeleo kwa kiwango kikubwa kutokana na takwimu mbalimbali kutoka katika Ukanda huo.